لحسة مخ .. بقلم : مصطفى البنا

السؤال اللى بيسأله اى حد هو فى ايه , والاجابة والله ما حد عارف حاجه , والناس خلاص قربت يجيلها لحسة مخ , ولا عارفين مين حرامى ولا مين شريف , ولا عارفين مين عايز مصلحة بلدنا ومين عايزة مصلحة نفسه , وعايشين فى حالة لخطبيتا .

-لما ببص على المشهد السياسى دايما افتكر الرقاصة اللى وقف الهز عشان تصلى العشا , وخلصت صلاه وفضلت تسبح وتدى الناس نصايح , وبعد الصلاه طلعت كملت رقص , طبعا محدش مصدق , لا فعلا فى رقاصة عملت كده , والواضح اننا فى عصر العوالم .

- انا مش هرغى كتير بس هديكم مثال بسيط , الدكتور محمد البلتاجى عضو جماعة الاخوان , مفيش مظاهره فى مصر الا وهو على الاكتاف اول واحد بيهتف , ومره شفته بيهتف ضد الغلاء , ولكن لان عندى فضول قررت ازور عيادتة اللى فى الحى الشعبى فى شبرا الخيمة وللتوضيح امام كوبرى عرابى فى برج الاطباء , عارفين الكشف بتاع سيادته كام 100 جنية وفى حى شعبى , مش هو ده بتاع الغلاء !!!

- فى معادلة غلط , قولت زمان وهفضل اقول , مش معقول اطالب بالتغيير وانا كلى عيوب , ذى الرقاصة بالظبط بتروح تحج وتعمل عمره وبعدها بيومين تلبس بدلة الرقص , ودة حال ناس كتير فى مصر
قال تعالى : { أتأمرون الناس بالبر وتنسون أنفسكم وأنتم تتلون الكتاب أفلا تعقلون } (البقرة:44)
اهو احنا كده بالظبط عاملين ملايكة واحنا شياطين , واحد بينهب فى الغلابه وطالع يدافع عنهم ازاااى !!! ذى بالظبط الصديق اللى راح التحرير وهو راجع بعربيته مشى عكسى عشان الدنيا زحمه !!! وذى برده صديقى الثالث اللى راح التحرير وفى جيبة خبورين وحتة حشيش !!! وذى برده صديقى الرابع اللى سحب مزته فى ايده وبرده على التحرير !! على فكرة الامثله دى بجد .

- سمعونا نغمة هنغير وهنتغير , لكن احنا غيرنا نظام ومش مستعدين نغير نظامنا , ذى الحرامى اللى سرق شنط ناس كتير فى التحرير وهو بيهتف الشعب يريد اسقاط النظام .

- المعادلة اللى بتكلم عليها لن يغير الله بقوم حتى يغيروا ما بأنفسهم , والحقيقة انى دايما احسب حسباتى بالدين لانه منهج الحياة , بصراحة فى كلام كتير نفسى اقوله بس مش عايز اطول اكتر من كده , والرسالة اللى عايز اوصلها ان الواضح جدا اننا كلنا فينا عيوب , ومش هتتصلح بلدنا بتغيير نظام لازم احنا كمان نغير نظامنا , ورسالة بوجهها لكل واحد عازم على التغيير , رسالة من الامام الشافعى لكل واحد عايز يغير وهو مش متغير
يقول الامام الشافعى رحمه الله
ياواعظا للناس عما انت فاعله
يامن يعد عليه العمر بالنفس
احفظ لشيبك من عيب يدنسه
ان البياض قليل الحمل للد
كحامل لثياب الناس يغسلها
وثوبه غارق فى الرجس والنجس
تبغى النجاة ولم تملك طريقتها
ان السفينة لا تجرى على اليبس
ركوبك النعش ينسيك الركوب على
ما كنت تركب من بغل ومن فرس
يوم القيامة لا مال ولا ولد
وظمة القبر تنسى ليلة العرس
-----------------------------------------
هذة وجه نظرى ربما تختلف معى او تتفق معى ولكنه فى النهاية صوت ضميرى الذى سيحاسبنى عليه الله .... مصطفى البنا

كـــــــــــــــــــــــــان زمان وما يحدث الان

كان في ولد غلبان اسمه سعفان

كان بيحلم بشغلانه جنان

لكن اااااخ من الزمان

سمع من ناس ان الدنيا بالالوان 

ولما نزل الشارع لقى كل شيء بهتان

قعد يدور طيب راح فين الانسان

قال يسال صاحبه عدنان

راح معدي عليه جنب موقف الترجمان

ولاقاه بيرتب شنطته ومسافر السودان

طيب ليه يا عدنان قاله بلد دي توهان 

رايح لابن خالي في ام درمان

اشتغل حتى فاعل باليوميه بدل ما اقعد هنا وسط الجنان

قالوا وهتسيب افنان بنت الجيران

قالوا ما اتقدملها واد معاه صنعه ووافقوا عليه اسمه شعبان

رحت قايل حسبي الله ونعم الوكيل في كل اللي دمر مستقبل امة الاحسان

الفكر

يزال فكر النظام السابق مسيطر على عقلية الموظف المصري حيث انه يدور في نفس المدار الخاص به ولا يترك فرصه له او لغيره بتطوير فكره ولا اعلم ان كان مقصود فتلك مصيبه وان كان غير مقصود فالمصيبه اعظم .
يوجد اناس مستفيده من عدم وجود نظام حيث الفوضى يمكن ان تسلك امورك بها .
ذهب مره الى المدير العام بالشركه اطلب منه السماع الى مقترحات مني ومن غيري فاذا به يقول وانتوا تعرفوا ايه عن الشغل ولا عن قرارات مجلس الاداره انتوا حايله ادوات بتنفذ الاوامر !!!!!!!!!!!!!!!!!!!!!!!!
هل ستتغير الدنيا؟